علشان نخلص بقى

الحال فى مصر حاليا أصبح متشابكا، ولا يبشر بالإنتظام فى المستقبل القريب ،،،، وأخشى أنه ولا البعيد أيضا، والسبب ؟؟؟

السبب الرئيسى والمزمن هو محاكمات مبارك وأبناءه وأعوانه،، اللغط الإعلامى ، والسخط الشعبى فى معظمه يدور حول هذا الفلك فى دائرة مفرغة، الإجراءات بطيئة ( من وجهة نظر الشعب ) ولكنها وفقا لعرف القضاء ( وأنا من العاملين بهذا الحقل ) عادية جدا بل وقد تكون أسرع من المعتاد، إخلاء السبيل مرفوض شعبيا وثوريا، ولكنه من وجهة نظر المحكمة صائب تماما بالنظر لإنتفاء مبررات الحبس الإحتياطى وفقا لعقيدة المحكمة،، بقاء الرجل فى شرم الشيخ جريمة فى حق الثورة من وجهة نظر الشعب ولكنها من وجهة النظر العسكرية ملائمة تماما ولاغبار عليها، ويكفى أننا سنحاكمة،، يبقى المفروض الناس تختشى شوية بقى وتحط فى عينها حصوة ملح....

المهم إن آثار كل هذا هى إستمرار الإعتصامات ،، وإصرار من لديهم إصرار على سير الأمور بهذا النحو،، وقد ندخل فى جدل عقيم يؤدى بدوره الى الدوران فى دائرة مفرغة أخرى،، هو:

الشعب: يا مجلس كدة مش هاينفع والثورة أهدافها مش بتحقق 

المجلس: طيب واحنا نعمل إيه، حكومة من الميدان وعيننا، والمفروض هما اللى يحققوا أهداف الميدان

الشعب: ماهى الحكوموة مش عارفة تعمل حاجة 

المجلس: معلش أهه على قد ما بيقدروا وإحنا مش عاوزين نحكم البلد حكم عسكرى 

الشعب: طيب ومبارك وأعوانه اللى قاعدين بيدلعوا على الآخر

المجلس: الموضوع ده خرج من إيدينا وأصبح تحت تصرف القضاء والقضاء بيطبق الإجراءات اللى هو شايفها قانونية

الشعب: لا ،،، ماهو مش هاينفع النظام ده ، حاكموهم محاكمات عسكرية

المجلس: لو حاكمناهم محاكمات عسكرية مش هانعرف نجيب الفلوس اللى بره

الشعب: مش مهم الفلوس ،،، بس خلصوا عليهم وإشفوا غليلنا

المجلس: هو ده كلام برضه؟! ده إقتصاد البلد ضايع خالص وفى عرض الدولار،، ده كلام ناس وطنيين برضه 

الشعب: طيب ماهم بياخدوا براءات أهه، يعنى برضه مش هانعرف نجيب الفلوس اللى بره

المجلس: والله المحاكمات عادلة ونزيهه وقانونية، واللى ياخد براءه فى قضية ( يلبس ) حكم فى قضية تانية،، ماتقلقوش القضايا كتير

المهم ... هانفضل فى هذا الجدل السفسطائى بصورة لا نهائية لن تنتهى، والمجلس يقول للناس فضوا الإعتصام والناس تقول أبدا .. والحكومة - ولا حول ولا قوة إلا بالله - بتناقش ممر التنمية بتاع الدكتور فاروق وبتعمل علاقات مع دول افريقية، وكأن الأمر فى البلد أصبح مستتب ولا غبار عليه وبنبص للمستقبل بقى...

والمستفيد الوحيد من اللغط الدائر هم كباتن الداخلية اللى رجعوا يمارسوا نشاطهم القديم ضد المواطنين الغلابة بدون أى تغيير،، إستغلالا للكلام الفاضى اللى إحنا عايشين فيه ده.

أنا شايف حل للظلمة اللى بتمر بينا دى ،،، ألا وهو: 

المجلس العسكرى يصدر مرسوم بقانون بفرض مبلغ من المال على كل من المتهمين إياهم يردوه لخزانة الدولة مقابل صدور عفو مشروط عنهم فى كل القضايا الجنائية التى يحاكمون فيها، وهذا العفو ( كما قلنا ) مشروط ،،، مشروط بإيه بقى ؟؟ بإنهم يغادروا البلد بشكل نهائى ولا يسمح لهم بدخول البلاد لمده معينة لا تقل عن عشرة سنوات مع حرمانهم من كل الحقوق السياسية الخاصة بهم.

المهم بقى أن يتم طرح هذا المرسوم بقانون للإستفتاء الشعبى العام، فإذا نجح يتم تطبيقه ،،،،،، عشان نخلص بقى ونشوف حال البلد هايمشى إزاى ،،،، وإذا سقط ....... نرجع لفقرة الحوار الشعبى - العسكرى ،،، مع إفساح مساحة أكبر للإخوة المحللين السياسيين فى البرامج التليفزيونية

وعلى فكرة ،،، أنا والله مش فُلولُه